Киіне білуі тиіс

Жарасымды киіне білу де - тәрбие

Адам өмірге келген соң қоршаған ортаға сай сәнді киіне білуі тиіс. Өзіңнің, балаларыңның  алдында  да, жанұяңның алдында да таза, ұқыпты, жинақы жүру – үлкен тәрбие.  Жарасымды киіне білу де - тәрбиенің бір түрі.

Адамның мінез-құлқы, адамгершілігі, қоршаған ортаға өзін сыйлата білуі  – дұрыс жүріп-тұруы мен киінуіне де тікелей байланысты.  Біріншіден, ішкі жан-дүниең де таза болу керек. Екіншіден, сыртқы көркіңмен кісіге де көріне білуің керек.

Кезінде қасымда жұмыс  жасаған жора-жолдастарыма,  қыз-келіншектерге жарасымды киіне білу турасында ақыл-кеңесімді айтқанмын...

Күн сайын киім ауыстырмау, күн сайын киім ауыстыру - мәдениеттілік  емес. Менде «мынадай бар, мынадай  бар» деген керегі жоқ. Бір жетіде бір киім кию керек. Әйел адамдар  бір түсті, етек-жеңі жинақы киім киіңдер, ала киім кимеңдер кеңседе! Костюм киіңдер! Бүгін ала көйлек киіп, ертең жылтыр көйлек кие шықпаңдар деп талай  кеңес бергенмін. Әркімнің талғамы - әр түрлі болады ғой, бірақ...

Жалпы өз басым бір түстіден киінем. Әйел заты болсам да жылтырға әуес емеспін. Жас кезімде сақина, сырға тағып көргем жоқ. Соңғы кездері немерелерім ер жетіп өсіп, «Әже, сізде сырға тағыңызсайшы!» деп құлағымды тестіріп сырға тақты.

Иә, дұрыс айтасыз, кейбір киімдерді абайлап кию керек. Солардың бірнешеуін атап айтар болсақ, денсаулыққа залал келтіру жағынан ең бірінші орында – бүгінде қыз-жігіттер тастамай киетін джинси шалбарлар. Тырысқан джинси кию, белді белдікпен қатты қысу жамбас сүйектерінің дұрыс жетілуіне, асқазанның ас қорытуына, жүйке тамырларының қызметіне кері әсерін тигізеді. Мамандардың айтуынша, көбіне тырысқан джинсиді әсіресе қыздар денелерін сымбатты етіп көрсету үшін киеді, алайда оның зияндығын түсіне бермейді. Тағы бір пайдасынан зияны көп киімдердің бірі – бізөкшелі туфлилер. Аптасына үш рет биік өкшелі аяқкиім киюдің өзі сіңірдің созылуына, табан терісінің жарылуына, сүйелдердің пайда болуына әкеледі. Сондықтан биік өкшелі аяқкиімді аптасына екі рет қана киіңіз және мұндай аяқкиімдерді таңдауда да мұқият болған жөн. Қара тізімге кіретін заттың бірі – галстук. Галстукті жиі тағуға мәжбүр адамдардың басы жиі ауырады. Галстук тамақты қысып тұратындықтан, мидың қан айналымы нашарлайды. Сондықтан адамның жүрегі айнып, көзінің көру қабілеті нашарлап, үнемі шаршаңқы жүреді.